 |
    |
    |
 |
    |
    |
 |
 |
పురాణేతిహాసములు | శ్రీమహాభారతము | ఆరణ్యపర్వము - పంచమాశ్వాసము |  |
ధర్మవ్యాధుఁడు కౌశికునకు జీవలక్షణంబులు సెప్పుట (సం. 3-200-26)
| క. |
‘విను జీవుండు సనాతనుఁ | డనఘుఁడు నిజకర్మవశత నధ్రువదేహం బునఁ బొందు దేహపాతం | బున నెప్పుడుఁ జెడఁ డతండు భూసురవర్యా! |
72 |
| క. |
ఈ యొడలు విడిచి వేఱొక | కాయముఁ గైకొని శరీరి కర్మవశగతిం బోయి సుఖదుఃఖములు గనుఁ; | బాయక వెండియును దేహబంధముఁ బొందున్.’ |
73 |
| వ. | అనిన విని బ్రాహ్మణుండు లుబ్ధకునితోడం ‘బుణ్యపాపానురూపంబు లయిన దేహబంధంబు లెట్టి?’ వనిన వాఁ డి ట్లనియె. | 74 |
| చ. |
‘స్థిరమగు పుణ్యకర్మమున దేవభవం బగుఁ, బుణ్యపాప సం కరమున మానుషత్వ మగుఁ, గల్మషముల్ పశుకీట భావముం బొరయఁగఁ జేయు; నిప్పగిదిఁ బుట్టుచుఁ జచ్చుచు మోహవార్ధిలోఁ దిరుగుచునుండుఁ గాని యొకతీరము సేరఁడు జీవుఁ డెన్నఁడున్. |
75 |
| చ. |
ఇది సకలంబుఁ గాంచి బుధుఁ డెన్నఁడుఁ బాపము పొంతఁ బోక ని ర్మదనిరహంక్రియాత్ముఁడును మత్సరదూరుఁడు నై చరించుఁ బెం పొదవఁగ ధర్మమార్గమున నొయ్యన ధర్మము తీ పెఱింగి తా వదలఁడు సత్క్రియావిధము వారక యెక్కు డొనర్చు ధర్మముల్. |
76 |
| చ. |
చిరముగ ధర్మముల్ నడపఁ జిత్తము దేఱుఁ బ్రసన్నచిత్తుఁ డై పరువడి నింద్రియార్థముల భంగులు రిత్తలుగా నెఱింగి చె చ్చెర నవి యంతవట్టు నిరసించి తపో దమ సత్యశీలతం బరిణతి నొందుఁ బొందుఁ బిదపం బరమార్థపదప్రభావమున్.’ |
77 |
| వ. | అనిన నమ్మహాద్విజుండు ధర్మవ్యాధున కి ట్లనియె. | 78 |
| ఆ. |
‘ఇంద్రియంబు లనఁగ నెయ్యవి? యవి నిగ్ర | హింపకున్నఁ బాప మేమి దొడరు? వాని నిగ్రహించువానికి నగు ఫలం | బెట్టి?’ దనిన నాతఁ డిట్టు లనియె. |
79 |
| క. |
‘విను విషయజ్ఞానమునకు | ననయంబును మనసు మూల; మది కామక్రో ధనిరూఢ మగుచుఁ బురుషుని | ననిశము నెలయించు నింద్రియార్థక్రియలన్. |
80 |
| సీ. |
ఇంద్రియార్థంబుల కెలసిన పురుషుండు | గాఢరాగంబునఁ గరఁగుచుండు; రాగంబువలనఁ దిరంబగు లోభంబు | లోభియై కరుణకు లోనుగాఁడు; మఱి సముద్ధతవృత్తి మరగుఁ బాపక్రియఁ | దగువారు సెప్పెడి తగవు వినఁడు; కుజనుల దెసఁ బ్రీతి గొఱలుఁ; దుల్యంబులు | గాకుండు వాఙ్మనఃకర్మభంగు; |
|
| ఆ. |
లిహమునందుఁ బుణ్యహీనుఁడై చెడిపోవుఁ | బరమునందు దుఃఖభరము నొందుఁ; గాన యింద్రియార్థగతిఁ బోక సాధుసం | సర్గఁ జేసి సుగతిఁ జనుట యొప్పు. |
81 |
| వ. | ఇంద్రియంబు లన నెయ్యవి యనియు, నింద్రియ జయసిద్ధియు నీవు నన్నడిగితివి; తత్ప్రకారంబు బ్రహ్మవిద్యావిషయంబు మాబోఁటివారికి నవాచ్యం బై యుండు; నైనను నీవు బ్రాహ్మణప్రవరుండవు గావున సద్బ్రాహ్మణ ప్రియం బవశ్యకర్తవ్యంబు; పరమబ్రహ్మవిదు లైన బ్రాహ్మణవరులకు నమస్కరించి, బ్రహ్మవిద్యాప్రపంచం బెఱింగించెద; నవధాన పరుండ వై యాకర్ణింపుము. | 82 |
|
 |
|