శ్రీమహాభారతము - శాంతిపర్వము - పంచమాశ్వాసము - భీష్ముఁడు ధర్మజునకు ముక్తిమార్గము దెల్పుట - కవిత్రయ భారతము - కవిత్రయము - నన్నయ - తిక్కన - ఎఱ్ఱన - ఆంధ్రమహాభారతము

భీష్ముఁడు ధర్మజునకు ముక్తిమార్గము దెల్పుట (సం. 12-265-2)

క.	‘పురుషుం డేమిటఁ బాపా \| చరణమునకుఁ జొచ్చు? ధర్మచర్యకు మూలం బరయఁగ నెయ్యది? రెంటిం \| బొరయం డెద్దాన? నెట్లు వొందును ముక్తిన్‌?’	363
వ.	అని యడిగిన నతనికి భీష్ముం డిట్లనియె.	364
సీ.	‘గంధరసాదుల కాంక్ష లోభము మోహ \| మును దెచ్చు; నద్దోషమునకు మనసు లోనైన ధర్మవిలోపంబు వాటిల్లు; \| దానఁ బాపము సేయు తలఁపు లొదవు; బ్రజ్ఞ నక్కీడులు భావించి సద్గోష్ఠిఁ \| బరఁగంగ విషయతత్పరత మాను; నది ధర్మబుద్ధికి నాలవాలం బగు; \| ధర్మాచరణములఁ దనివి సనక
తే.	హృద్గత ద్వంద్వముల నెల్ల నెడల విడుచు \| ననఘ! యనపాయ మగు నుపాయమున ముక్తి వడయుఁ బదపడి; యేను నీయడిగినంత \| వట్టుఁ దెలిపితి ధర్మనిర్వాహి వగుము.’	365
తే.	అనుడు ననపాయ మగు నుపాయం బనంగఁ \| జెప్పి తొక్కటి; మోక్షంబుఁ జెందుతెఱఁగు దానిఁ దెలియంగ నెఱిఁగింపవే నరేంద్ర \| ముఖ్య!’ యనియె నక్కురువంశముఖ్యుఁ డధిప!	366
వ.	అనుటయు నమ్మహీకాంతునకు శాంతనవుం డిట్లనియె.	367
క.	‘వినుము ఘటము సేయుట సా \| ధనములు లేకున్న నగునె ధరణిప! పూర్వాం బునిధికిఁ జను మార్గ మపర \| వనరాశికిఁ జనునె? వెరవు వలయుం దెలియన్‌.	368
వ.	అడిగి మేలు సేసి తాకర్ణింపుము.	369
సీ.	క్షమఁ గ్రోధ, మకృత సంకల్పతఁ గామంబు, \| చిరనిద్ర సత్త్వసంసేవనమున గాఢధైర్యమున రాగద్వేషములు, భయ \| మప్రమాదమున, మోహంబు భ్రమము వినివర్తనాభ్యాసమున రోగములు నుప \| ద్రవములు హితము మితంబు గాల యోజితంబును నగు భోజనంబున జీవ \| సందర్శనమున నిశ్శ్వాస మఖిల
తే.	విషయములు నంతవిరసతా వేక్షణమున \| నిత్యసంతోషమున లోభనిరతి కృప న ధర్మ ముచిత కృతావేక్ష ధర్మ మవులఁ \| ద్రోవనేర్చుట ముక్తికిఁ ద్రోవ యధిప!	370
తే.	తాను గ్రోధాదు లెడలించుఁగాని ముక్తిఁ \| దెచ్చి యీ; దొకభంగి ముక్తికిఁ బథంబు నగుట ననపాయ మగు నుపాయం బనంగ \| వలసె నీ నేర్పు పే రిందువంశవర్య!	371
చ.	అనుడు నజాతశత్రుఁ ‘డిటు లన్నలు దమ్ములు లోనుగాఁగఁ దృ ష్ణ నఖిలబంధుకోటులనుఁ జంపెడు తెం పొలసెన్‌ మహాత్మ! యే యనువునఁ దృష్ణ త్రోపువడునట్టి సమంచితచిత్త ధర్మముం బనుపఱుపంగ జాలు కలభాషణ పంక్తి ననుగ్రహింపవే!’	372
క.	అనుటయు దేవవ్రతుఁ డ \| మ్మనుజపతికి నిట్టు లనియె ‘మాండవ్యునితో జనకుఁడు సెప్పిన మాటలు \| విను; మవి తృష్ణ నడఁగించు వెరవు నొనర్చున్‌.	373