అధ్యాత్మ సంకీర్తన
రేకు: 197-1
సంపుటము: 2-496
రేకు: 197-1
సంపుటము: 2-496
తాళ్లపాక అన్నమాచార్య
రాగము: శంకరాభరణం
| చేపట్టి మమ్ముఁ గావు శ్రీనరసింహా నీ- శ్రీపాదములే దిక్కు శ్రీనరసింహా | ॥పల్లవి॥ |
| చెలఁగు వేయిచేతుల శ్రీనరసింహా చిలకేటి నగవుల శ్రీనరసింహా సిలుగులేని మంచిశ్రీనరసింహా నీ- చెలిఁ దొడెక్కించుకొన్న శ్రీనరసింహా | ॥చేప॥ |
| క్షీరసముద్రమువంటి శ్రీనరసింహా దైత్యుఁ జీరిన వజ్రపుగోళ్ల శ్రీనరసింహా చేరి ప్రహ్లాదునిమెచ్చే శ్రీనరసింహా నుతిం- చేరు దేవతలు నిన్ను శ్రీనరసింహా | ॥చేప॥ |
| శ్రీవనితతో మెలపు(గు?) శ్రీనరసింహా చేవదేరే నీమహిమ శ్రీనరసింహా శ్రీవేంకటాద్రిమీఁది శ్రీనరసింహా సర్వ- జీవదయాపరుఁడవో శ్రీనరసింహా | ॥చేప॥ |