ఆంధ్రభారతి - తాళ్లపాక అన్నమాచార్య కీర్తనలు - నరుఁడా యీతఁడు ఆదినారాయణుఁడు గాక - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 197-2
సంపుటము: 2-497

తాళ్లపాక అన్నమాచార్య

రాగము: సాళంగనాట

నరుఁడా యీతఁడు ఆదినారాయణుఁడు గాక ధరణిఁ గీరితికెక్కె దశరథసుతుఁడు	॥పల్లవి॥
యీతఁడాతాటకిఁ జంపె నీమారీచసుబాహుల- నీతఁడా మదమణఁచె నిందరుఁ జూడ యేతులకు హరువిల్లు యీతఁడా విరిచి యట్టె సీతఁ బెండ్లియాడెను యీచిన్నరాముఁడా	॥నరుఁ॥
చుప్పనాతిముక్కు గోసి సోదించి దైత్యులఁ జంపి అప్పుడిట్టె వాలి నేసినాతఁ డీతఁడా గుప్పించి కోఁతుల నేలి కొండల జలధి గట్టి కప్పి లంక సాధించె నీకౌసల్యనందఁనుడా	॥నరుఁ॥
రావణాదులనుఁ జంపి రక్షించి విభీషణుని భావిం చయోధ్య నీతఁడు పట్టమేలెను శ్రీవేంకటేశుఁ డితఁడే సృష్టి రక్షించె నితఁడే యీవల మాపాలనున్న యీరామచంద్రుఁడా	॥నరుఁ॥