ఆంధ్రభారతి - తాళ్లపాక అన్నమాచార్య కీర్తనలు - ఊరకే కలుగునా వున్నతపు మోక్షము - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 198-4
సంపుటము: 2-505

తాళ్లపాక అన్నమాచార్య

రాగము: ముఖారి

ఊరకే కలుగునా వున్నతపు మోక్షము శ్రీరమణు కృపచేతఁ జేరు మోక్షము	॥పల్లవి॥
కలుషముఁ బెడఁబాసి కర్మగండము గడచి మలసి నప్పుడుగా మరి మోక్షము చలనమించుక లేక సంసారవారధి దాఁటి నిలిచినప్పుడుగా నిజమోక్షము	॥ఊర॥
పంచేంద్రియాల మీరి భక్తి హరిమీఁద బెట్టి మంచివాఁడైనప్పుడుగా మరి మోక్షము అంచల యాసలు మాని ఆచార్యుసేవ చేసి మించినప్పుడుగా ఆమీఁది మోక్షము	॥ఊర॥
శాంతమే కూడుగానుండి సమచిత్తమునఁ బొంది మంతుకెక్కినప్పుడుగా మరి మోక్షము అంతట శ్రీవేంకటేశుఁ డాదరించి మన్నించితే నంతరంగమున నున్న దనాది మోక్షము	॥ఊర॥