ఆంధ్రభారతి - తాళ్లపాక అన్నమాచార్య కీర్తనలు - అంతవాని కింతసేయ నమరునటే - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 220-6
సంపుటము: 3-113

తాళ్లపాక అన్నమాచార్య

రాగము: ధన్నాసి

అంతవాని కింతసేయ నమరునటే వింతలు యీసుద్దులకే వెరగయ్యీ మాకు	॥పల్లవి॥
కదిసి బ్రహ్మాండములు గర్భములోనున్నదేవుఁ- డిదె దేవకి గర్భాన నెట్టు పుట్టెనే అదె మఱ్ఱాకుమీఁదట నటు పవ్వళించువాఁడు యెదుట యశోదచేత నెట్టు వినోదించీనే	॥అంత॥
అడుగులుమూఁట లోకాలటు గొలచినవాఁడు బడిబడి రేపల్లెఁ బారాడీని అడరి యజ్ఞభాగము లారగించే దేవుఁడు సడితో వెన్న ముచ్చిలి చవిగొనీనిదివో	॥అంత॥
వేదపల్లవములందు విహరించే దేవుఁడు సాదుగొల్లెతల రతిసంగడిఁ జిక్కె మోదపు వైకుంఠాన ముదమందే కృష్ణుడు యీదెస శ్రీవేంకటాద్రి నిరవాయ నిదివో	॥అంత॥