ఆంధ్రభారతి - తాళ్లపాక అన్నమాచార్య కీర్తనలు - దేవత లెందున్నవారో దిష్ట మెవ్వరిఁ గానము - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 221-2
సంపుటము: 3-115

తాళ్లపాక అన్నమాచార్య

రాగము: దేసాక్షి

దేవత లెందున్నవారో దిష్ట మెవ్వరిఁ గానము యీవలఁ దామే కలితే నేమని రావలదా	॥పల్లవి॥
పరమేదో ఇహమేదో బదికే జీవులకెల్ల నరకపు దేహాలలో నానుచున్నారు అరసి పుట్టించినట్టి అజుఁ డెందు దాఁగినాఁడో సరిగాన మెవ్వరిఁ గొసరేమంటేను	॥దేవ॥
యేమి గలి గేమి సెలవెన్నటికో తమమేలు యీ మేరఁ బ్రాణులు మాయ నీఁదుచున్నారు భూమికి దిక్కైనవారు పొడచూపి కావవద్దా దీముగా నిలువలేరు తెలిసేమంటేను	॥దేవ॥
తుదయేడ మొదలేడ తొంగి చూచేవారెవ్వరు అదె సంసారానఁ బ్రాణులాడుచున్నారు ఇదె శ్రీవేంకటేశ్వరుఁ డింతలో విచ్చేసి కాచె యెదుట రక్షకుఁడైతే నిట్టుండవలదా	॥దేవ॥