ఆంధ్రభారతి - తాళ్లపాక అన్నమాచార్య కీర్తనలు - శరణాగత వజ్రపంజరుఁ డీతఁడు చక్రధరుఁ డసురసంహారుఁడు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 221-4
సంపుటము: 3-117

తాళ్లపాక అన్నమాచార్య

రాగము: ధన్నాసి

శరణాగత వజ్రపంజరుఁ డీతఁడు చక్రధరుఁ డసురసంహారుఁడు వెరవుతోడఁ దను శరణనువారి వెనుబల మీతఁడే రక్షకుఁడు	॥పల్లవి॥
హరినామోచ్చారణఁ దెగనికర్మ మవల వేరొకటున్నదా అరసి యెందు నమ్మిక చాలక ప్రాయశ్చిత్తంబులు చెప్పుదురు ధర నెరఁగనివారేమనినాఁ దామసులగొడవ యేమిటికి హరిహరి యంటే దురితము లణఁగెను అతఁడే మాకిఁక రక్షకుఁడు	॥శర॥
శ్రీపతి దిక్కయి కావఁగ మరియునుఁ జేరని సంపద లిఁకనేవి చాపలబుద్ధుల (లు?) నది నమ్మక విచ్చనవిడి నోములు చెప్పుదురు తీపులు పుట్టించి యెవ్వరేమనినఁ దెలిపి వాదడువ నేమిటికి శ్రీపతిఁ గొలిచితి చేరె సంపదలు జిగి నితఁడే మా రక్షకుఁడు	॥శర॥
అంతరాత్మ శ్రీవేంకటేశ్వరుఁడు అన్యము భజించఁ జో టేది యింతట నమ్మక దేవతాంతరము లేఁటేఁటివో మరి చెప్పుదురు యెంతలేదు ప్రాకృతజనముల భ్రమ యెవ్వరిఁ గాదన నేమిటికి యింతకు శ్రీవేంకటేశుదాసులము యీతఁడే మాకిఁక రక్షకుఁడు	॥శర॥