ఆంధ్రభారతి - తాళ్లపాక అన్నమాచార్య కీర్తనలు - కరుణానిధి నీవే కనుఁగొంచునున్నాఁడవు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 238-6
సంపుటము: 3-221

తాళ్లపాక అన్నమాచార్య

రాగము: భైరవి

కరుణానిధి నీవే కనుఁగొంచునున్నాఁడవు యిరవై నాలో నున్నాఁడ వేది గతి యిఁకను	॥పల్లవి॥
పేరుచున్నవి నాలోనఁ బెక్కు వికారములు వూరుచున్నవెన్నైనా వూహలెల్లాను చేరుచున్నవొక్కొక్కటే సేనాసేనకోరికలు యీరీతి నున్నాఁడ నాకు నేది గతి యిఁకను	॥కరు॥
పట్టుచున్నవి నానాప్రకృతుల వోజలు పుట్టుచున్నవి యనేకభోగేచ్ఛలు చుట్టుకొనుచున్నవి సులభపు వేడుకలు యిట్టివి నానడతలు యేది గతి యిఁకను	॥కరు॥
సందడింపుచున్నవి సారెకు నా మమతలు ముందువెనకై వున్నవి మోహాలెల్లా చెందె నీపై భక్తి నేఁడు శ్రీవేంకటేశ్వర యెందునూ నీవే కాక యేది గతి యిఁకను	॥కరు॥