ఆంధ్రభారతి - తాళ్లపాక అన్నమాచార్య కీర్తనలు - దేవా నీవే యిన్ని చందముల తిరముగ మహోపకారి వైతివి - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 242-2
సంపుటము: 3-240

తాళ్లపాక అన్నమాచార్య

రాగము: బౌళి

దేవా నీవే యిన్ని చందముల తిరముగ మహోపకారి వైతివి యేవలనైనా నీవేకాక భువి నింతటివారలు యిఁకఁ గలరా	॥పల్లవి॥
జనులకు నీవే వొక్కొకచోటను శాస్త్రార్థములై కడఁగుదువు తనియక నీవే మరి వారికి బొధకులఁ గొందరినిఁ గల్పింతువు మనసులో నంతలో వొడఁబడికె చేసి మలయుచు నీవే నిలుతువు కనుఁగొన నీవే సుజ్ఞానమార్గము కైవసముగాఁ దెలుపుదువు	॥దేవా॥
కడఁగి యప్పటి నివే యజ్ఞాదికర్మఫలములై వుండుదువు తడయక నీవే తిరుపతుల దేవతామూర్తులై పొడచూపుదువు యెడయక నీవే తపోమహిమలై యెదుటనే తార్కాణ లౌదువు వొడలై నీవే యిహపరములకును వొడిగట్టి సాధింపింతువు	॥దేవా॥
ఆవేళ నీవే తత్త్వనిర్ణయము నాధారమునై యేర్పరతువు నీవే కమ్మటి ఆచారవిధులకు నియమములెల్లా నేర్పుదువు భావింప నీవే అలమేల్మంగకుఁ బతివై శ్రీవేంకటేశ రక్షింతువు జీవుల కంతర్యామివై నీవే శిష్టులఁ బరిపాలింతువు	॥దేవా॥