బయలు వందిలి వెట్టి పరగఁ జిత్తము గలిగె దయమాలి తిరుగ నాత్మజుఁ డొకఁడు గలిగె	॥బయలు॥
కనుచూపువలన నుడుగని కోరికలు గలిగె తనుకాంక్షవలనఁ బరితాపంబు గలిగె అనుభవానవలన మోహంధకారము గలిగె తనివి [1]దీరమివలన తలపోఁత గలిగె	॥బయలు॥
అడియాసవలన పాయని చలంబునుఁ గలిగె కడుమమతవలన చీఁకటి దవ్వఁగలిగె కడలేని తమకమునఁ [2]గాఁతాళమునుఁ గలిగె నడుమ నంతటికి మానని ప్రేమ గలిగె	॥బయలు॥
తరితీపువలన చిత్తభ్రాంతి తగఁ గలిగె విరహంబువలన పురవేదనలుఁ గలిగె తిరువేంకటాచలాధిపుని కరుణామృతము పరిపూర్ణమైన యాపద నీఁదఁ గలిగె	॥బయలు॥

---

^[1] ‘దీరని’ రేకు.

^[2] ‘గాంతాళము’ పూ.ము.పా. రేకులలో అంతటా ‘గాఁతాళ’మనియే.