Display:
అధ్యాత్మ సంకీర్తన
రేకు: 22-4
సంపుటము: 1-134
తాళ్లపాక అన్నమాచార్య
రాగము: ముఖారి
ఎంత సేయఁగలేదు యిటువంటి విధి యభవు-
నంతవానిని భిక్ష మడుగుకొనఁ జేసె
॥ఎంత॥
కోరి చంద్రునిఁ బట్టి గురుతల్ప[1]గునిఁ జేసె
కూరి మలరఁగ నింద్రుఁ గోడిఁ జేసె
ఘోర కుడువఁగఁ ద్రిశంకుని నంత్యజునిఁ జేసె
వీరుఁడగు నలుఁ బట్టి [2]విద్రూపుఁ జేసె
॥ఎంత॥
అతివ [3]నొడ్డుగఁ జూదమాడ ధర్మజుఁ జేసె
సతి నమ్ముకొన హరిశ్చంద్రుఁ జేసె
కుతిలపడ శూద్రకుని గొఱ్ఱెముచ్చుగఁ జేసె
మతిమాలి కురురాజు మడుఁగు చొరఁ జేసె
॥ఎంత॥
పడని పాట్ల బరచి బ్రహ్మ తల వోఁజేసె
తొడరి కాలుని కాలు దునియఁ జేసె
[4]అడర నీవిధికి విధియగు వేంకటేశు కృప
పడయకుండఁగ భంగపడకపోరాదు
॥ఎంత॥

[1] ‘తల్పకు’ రేకు; పూ.ము.పా.

[2] ‘విద్రూపు’ చింత్యము. ‘విరూపు’ కావచ్చు. సంగీతమునకై ‘వీరూపు’ అని పాడుకొన్నా ఫరవాలేదు.

[3] ‘నొడ్డుక’ కావచ్చు.

[4] ‘అడరని విధికి’ పూ.ము.పా.
AndhraBharati AMdhra bhArati - telugu కీర్తన సాహిత్యము