ఆంధ్రభారతి - తాళ్లపాక అన్నమాచార్య కీర్తనలు - ఇంకానేలా తర్కవాదములు యిన్నియు నిందునే ముగిసెను - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 261-5
సంపుటము: 3-353

తాళ్లపాక అన్నమాచార్య

రాగము: బౌళి

ఇంకానేలా తర్కవాదములు యిన్నియు నిందునే ముగిసెను యింకానేలా కొందరు మోక్షం బెవ్వరికిని లేదనుమాటా	॥పల్లవి॥
సరయువు పొంతను సకల జీవులకు సిరుల మోక్షమిచ్చితివని విన్నపుడే మరలుచు నాయనుమానము వాసెను ధర నీవొకఁడవే దైవమవని కంటినయ్యా	॥ఇంకా॥
తగిన లంకవొద్దను రాక్షసులను తెగనడిచి ముక్తితెరువు చూపినపుడే వగలఁ బెక్కుదేవతల వరంబులు జగతి నీపగకు సరిగావయ్యా	॥ఇంకా॥
యేమని చెప్పుదునిట్టి నీ మహిమ వేమరుఁ బురాణవిధి విన్నపుడు శ్రీమంతుఁడవు శ్రీవేంకటేశ్వర కామింప నీకంటే ఘనము లేదుగదవో‌అయ్యా	॥ఇంకా॥