Display:
అధ్యాత్మ సంకీర్తన
రేకు: 23-3
సంపుటము: 1-139
తాళ్లపాక అన్నమాచార్య
రాగము: భూపాళం
భోగిశయనమును బుసకొట్టెడిని
యోగనిద్ర పాయును మేల్కొనవే
॥భోగిశయనము॥
కన్నులు దెరవక కమలబాంధవుఁడు
వెన్నెల రేణువు వెలయ దిదే
అన్నున మలసీ నరుణోదయ మిదే
మిన్నక నీవిటు మేలుకొనవే
॥భోగిశయనము॥
తెల్లని కన్నులు దెరవక విరియఁగ
నొల్లక జలజము లున్నవివే
కల్లనిదుర నినుఁ గవియఁగ నియ్యక
మెల్లనాయ నిటు మేలుకొనవే
॥భోగిశయనము॥
[1]తెరవగు రెప్పలఁ దెల్లవారవలె
తెరవక చీఁకటి దీరదిదే
తెరఁగు వేంకటాధిప నీవెఱుఁగుదు
మెఱుఁగులు చల్లుచు మేలుకొనవే
॥భోగిశయనము॥

[1] ఈ చరణములో రేకులో, ఈ చరణము మొదటినుండి మూడుపాదములవరకు ప్రాసస్థానమున సాధురేఫమే. కడపటి పాదమున శకటరేఫ. యతిప్రాసస్థలములో ఈ వాఙ్మయమున సాధుశకటరేఫల సాంకర్య మరుదు. వ్రాయసకాని లోపము కావచ్చు. ‘మెరుఁగు’ను ‘మెఱుఁగు’గా చెక్కినాడేమో?
AndhraBharati AMdhra bhArati - telugu కీర్తన సాహిత్యము