ఆంధ్రభారతి - తాళ్లపాక అన్నమాచార్య కీర్తనలు - ఇతనికంటే మరి దైవముఁ గానము యెక్కడ వెదకిన నితఁడే - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 264-4
సంపుటము: 3-370

తాళ్లపాక అన్నమాచార్య

రాగము: సామంతం

ఇతనికంటే మరి దైవముఁ గానము యెక్కడ వెదకిన నితఁడే అతిశయమగు మహిమలతో వెలసెను అన్నిటి కాధారము దానె	॥పల్లవి॥
మది జలధుల నొక దైవము వెదకిన మత్స్యావతారం బితఁడు అదివో పాతాళమందు వెదకితే నాదికూర్మ మీవిష్ణుఁడు పొదిగొని యడవుల వెదకి చూచితే భూవరాహమని కంటిమి చెదఱక కొండల గుహల వెదకితే శ్రీనరసింహం బున్నాఁడు	॥ఇత॥
తెలిసి భూనభోంతరమున వెదకిన త్రివిక్రమాకృతి నిలిచినది బలువీరులలో వెదకి చూచితే పరశురాముఁ డొకఁడై నాఁడు తలఁపున శివుఁడునుఁ బార్వతి వెదకిన తారకబ్రహ్మము రాఘవుఁడు కెలఁకుల నావులమందల వెదకిన కృష్ణుఁడు రాముఁడునైనారు	॥ఇత॥
పొంచి యసురకాంతలలో వెదకిన బుద్ధావతారంబైనాఁడు మించిన కాలము కడపట వెదకిన మీఁదటి కల్క్యావతారము అంచెల జీవులలోపల వెదకిన నంతర్యామై మెరసెను యెంచుక ఇహమునఁ బరమున వెదకిన యీతఁడే శ్రీవేంకటవిభుఁడు	॥ఇత॥