ఆంధ్రభారతి - తాళ్లపాక అన్నమాచార్య కీర్తనలు - నీకెటు వలసె నటుసేయి నీచిత్తము నా భాగ్యము - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 265-2
సంపుటము: 3-373

తాళ్లపాక అన్నమాచార్య

రాగము: మలహరి

నీకెటు వలసె నటుసేయి నీచిత్తము నా భాగ్యము యేకడనైనా లక్ష్మీకాంతుఁడ ఇదియే పో నా విన్నపము	॥పల్లవి॥
నాగుణములే యెంచితినా నరక కూపములు చాలవు ఆగతినే నాకర్మములూ అనుభవించి తీర్చెనంటే నీ గుణములే యెంచితివా నిఖిలసంపదలు చాలవు యీగి ననుఁ గరుణించి యెపుడు నీవిచ్చేనంటేను	॥నీకె॥
నా పాపములే లెక్కించితినా నదుల యిసుకలునుఁ జాలవు యేపున నెంతైనాఁ గలదు అది యెన్నఁడు దీరును దేవా చేపట్టి నీవు రక్షించిన యాజీవుల నెంచితివా తొల్లి చూపట్టెడి యీయాకసంబు పై చుక్కలకంటే ఘనము	॥నీకె॥
మఱి నాసుద్దులు యెంచఁగ నెంచఁగ మంచముకిందే నూయి గుఱి నీకథలివి వినఁబోతే నివే కొండలుఁ గోటానఁగోట్లు నెఱవుగ శ్రీవేంకటేశ్వర నీకే నే శరణాగతి చొచ్చితిని తఱి దరిచేర్పఁగఁ గూడువెట్టఁగా దైవమ నీకే భారము	॥నీకె॥