ఆంధ్రభారతి - తాళ్లపాక అన్నమాచార్య కీర్తనలు - ఎక్కడి వుద్యోగాలు నేడకెక్కు జీవునికి - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 265-5
సంపుటము: 3-376

తాళ్లపాక అన్నమాచార్య

రాగము: గుండక్రియ

ఎక్కడి వుద్యోగాలు నేడకెక్కు జీవునికి నిక్కిచూచి హరి గరుణించిన దాఁకాను	॥పల్లవి॥
తనిసినవారు లేరు తగ నింద్రియభోగాలు పెనఁగఁ బెనఁగఁ బైపై బెరుగుఁ గాని మనసులోనికి రాదు మాటలలోని విరతి తునిగినట్లనుండు దొరకుదాఁకాను	॥ఎక్క॥
విడిచినవారు లేరు విషయాలు సంపదలు వుడుగక కోరఁగోర నొదగుఁగాని పుడిమి విన్నట్టుండదు పుస్తకాలలో చదువు నడుమంత్రములనుండు నానినదాఁకాను	॥ఎక్క॥
తెలిసినవారు లేరు దేవుని నాతుమలోన పలు లంపటాలఁ బడి భ్రమనుఁ గాని యెలమి శ్రీవేంకటేశుఁ డేమిటా మెచ్చఁడు తన్నుఁ దలఁచి భక్తితోడ దగ్గరుదాఁకాను	॥ఎక్క॥