ఆంధ్రభారతి - తాళ్లపాక అన్నమాచార్య కీర్తనలు - సకలశాంతికరము సర్వేశ నీపై భక్తి - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 266-1
సంపుటము: 3-377

తాళ్లపాక అన్నమాచార్య

రాగము: పాడి

సకలశాంతికరము సర్వేశ నీపై భక్తి ప్రకటమై మాకు నబ్బె బదికించు నిదియె	॥పల్లవి॥
మనసులో పాపబుద్ధి మరి యెంతదలఁచినా నినుఁ దలఁచినంతనే నీరౌను కనుఁగొన్నపాపములు కడలేనివైనాను ఘనుఁడ నిన్నుఁజూచితే కడకుఁ దొలఁగును	॥సక॥
చేతనంటి పాతకాలు సేవగా నేఁ జేసినాను ఆతల నీకుమొక్కితే నన్నియుఁ బాయు ఘాతలఁ జెవుల వినఁగా నంటిన పాపము నీతితో నీ కథ వింటే నిమిషానఁ బాయును	॥సక॥
కాయమునఁ జేసేటి కర్మపుఁ బాపములెల్ల కాయపు నీ ముద్రలచే గక్కన వీడు యేయెడ శ్రీవేంకటేశ యేయేపాతకమైనా ఆయమైన నీశరణాగతిచే నణఁగు	॥సక॥