ఆంధ్రభారతి - తాళ్లపాక అన్నమాచార్య కీర్తనలు - బాపురే వో ప్రాణి బాపురే వో మనసా - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 268-3
సంపుటము: 3-391

తాళ్లపాక అన్నమాచార్య

రాగము: బౌళి

బాపురే వో ప్రాణి బాపురే వో మనసా వో పనస వెందుకైనా నొడఁబడేవు	॥పల్లవి॥
మురికి దేహమొకటి మోచుక నీ వప్పటిని మురికి దేహసతుల మోవఁగోరే వప్పటిని కరకు హేయము గొంత కడుపున నించుకొని తిరిగి హేయమేకాను(?) తినఁబోయే వప్పటి	॥బాపు॥
పసిఁడి కమ్ముడువోయి పరులఁగొలిచి మరిఁ బసిఁడి సొమ్మంటాఁ బైఁ బెట్టఁ గోరేవు పిసరుఁ బాపపుణ్యాలఁ బెడఁగేలు గట్టించుక విసువక అవియే కావించఁబోయే వప్పటి	॥బాపు॥
పంచభూతములచేతఁ బట్టువడి కమ్మరాను పంచభూతాల దేహుల బంధులంటాఁ దగిలేవు అంచెల శ్రీవేంకటేశుఁ డాతుమలో నున్నవాఁడు యెంచుక తెలిసియును ఇట్టె మరచే వప్పటి	॥బాపు॥