ఆపదల సంపదల నలయు టేమిట మాను రూపింప నిన్నిటను రోసిననుఁ గాక	॥ఆపదల॥
కడలేని దేహరోగంబు లేమిట మాను జడను విడిపించు నౌషధసేవఁ గాక విడవ కడియాస తను వేఁచు టేమిట మాను వొడలి కల గుణమెల్ల నుడిగిననుఁ గాక	॥ఆపదల॥
దురితసంగ్రహమైన దుఃఖ మేమిట మాను సరిలేని సౌఖ్యంబు చవిగొన్నఁ గాక కరుకైన మోహంధకార మేమిట మాను అరిది తేజోమార్గ మలవడినఁ గాక	॥ఆపదల॥
[1]చావులోఁ బెనగొన్న జన్మ మేమిట మాను [2]యీవలావలి కర్మ మెడసినఁ గాక భావింప నరుదైన బంధ మేమిట మాను శ్రీవేంకటేశ్వరుని సేవచేఁ గాక	॥ఆపదల॥

---

^[1] ‘చావుతో’ కావచ్చు.

^[2] ‘యీపలాపలి’ పూ.ము.పా. ప్రాసభంగము.