ఆంధ్రభారతి - తాళ్లపాక అన్నమాచార్య కీర్తనలు - మాయలఁ బొరలఁగనేఁటికి మనసా కలకాలంబును - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 270-4
సంపుటము: 3-404

తాళ్లపాక అన్నమాచార్య

రాగము: దేవగాంధారి

మాయలఁ బొరలఁగనేఁటికి మనసా కలకాలంబును యేయెడ లక్ష్మీకాంతుఁ డీతనిఁ దలఁచవుగా	॥పల్లవి॥
మన్నునఁ బుట్టిన కాయము మన్నున నణఁగేటి దింతే మిన్నుల మీఁదికిఁ బోవదు మెరయుచు నెంతైనా అన్నిట నీ జీవునికిని అంతర్యామీ దేవుఁడు యెన్నఁడుఁ బాయని బంధువుఁ డీతనిఁ దలఁచవుగా	॥మాయ॥
ధరపైఁ బుట్టిన దేహము ధరపైఁ బుట్టి(ట్టు?)న దింతే పరమానందము గోరదు పైపై నెంతయినా గరిమల నీ జీవునికిని గతియగు దేవుం డీతఁడు నిరతపు సుఖములె యొసఁగును నీవిటు దలఁచవుగా	॥మాయ॥
శ్రీవేంకటపతి సొమ్ములు చేరెడి దాతని నింతే ఆవల నితరుల నంటవు ఆతుమ లన్నియును యేవిధముల నీ జీవుని కేలికె యీదేవుండే పావనముగ బ్రదికించెను పయికొని తలఁచవుగా	॥మాయ॥