ఆంధ్రభారతి - తాళ్లపాక అన్నమాచార్య కీర్తనలు - కలవి రెండే భూమి కామనిధానంబులు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 272-1
సంపుటము: 3-412

తాళ్లపాక అన్నమాచార్య

రాగము: దేసాక్షి

కలవి రెండే భూమి కామనిధానంబులు జలజాక్షుఁడు నతని శరణాగతియును	॥పల్లవి॥
నరులు లేరా భూమి నానాదిక్కులలోన హరిదాఁసుఁడొక్కఁడే యరుదుఁ గాక సురలు లేరా మింట సోదించ ఘనుఁ డొక్కఁడే పరమపదమేలు శ్రీపతియే కాక	॥కల॥
మాటలు లేవా భూమి మంత్రము లెంచి చూడఁగ తేటల హరినామమే తేఁకువఁ గాక కోటిపూజ లిల లేవా కుమతులు సేసేవి పాటల ప్రపన్నుని భక్తి దొడ్డుఁ గాక	॥కల॥
విహితసుఖము లేదా విశ్వములో భోగించ సహజమోక్షసుఖమే సారముఁ గాక యిహమున శ్రీవేంకటేశుఁ డిందరికి లేఁడా మహి శ్రీవైష్ణవులకే మనికాయఁ గాక	॥కల॥