ఆంధ్రభారతి - తాళ్లపాక అన్నమాచార్య కీర్తనలు - వెదకవో చిత్తమా వివేకించి నీవు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 272-4
సంపుటము: 3-415

తాళ్లపాక అన్నమాచార్య

రాగము: దేసాళం

వెదకవో చిత్తమా వివేకించి నీవు అదనఁ దదియ్యసేవ అంతకంటే మేలు	॥పల్లవి॥
చూపులెన్నైనాఁ గలవు సూర్యమండలముదాఁకా చూపులు శ్రీహరిరూపు చూడ దొరకదు గాని తీపులెన్నైనాఁ గలవు తినఁ దిన నాలికెకు తీపు శ్రీహరిప్రసాదతీర్థమని కోరదు	॥వెద॥
మాటలెన్నైనాఁ గలవు మరిగితే లోకమందు మాటలు శ్రీహరినామము మరపఁగ వలె తేటలెన్నైనాఁ గలవు తీరని చదువులందు తేటగా రామానుజులు తేరిచె వేదములలో	॥వెద॥
చేఁతలెన్నైనాఁ గలవు సేసేమంటే భూమి చేఁతల శ్రీవేంకటేశు సేవ సేయవలెను వ్రాఁతలెన్నైనాఁ గలవు వనజభవుని ముద్ర- వ్రాఁతలు చక్రాంకితాలె వహికెక్కే ముద్రలు	॥వెద॥