ఆంధ్రభారతి - తాళ్లపాక అన్నమాచార్య కీర్తనలు - బహుకుటుంబివి నీవు బ్రతుకఁగ వెరవేదో - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 272-5
సంపుటము: 3-416

తాళ్లపాక అన్నమాచార్య

రాగము: లలిత

బహుకుటుంబివి నీవు బ్రతుకఁగ వెరవేదో విహగగమన నాకు వెరగయ్యీ నిందుకే	॥పల్లవి॥
పుట్టేటి జంతువులు భువనములెల్లా నిండె ఇట్టి బ్రహ్మాండకోట్లు ఇన్నియు నీ మేన నిండె ఇట్టె ఇందరి రక్షించే యితవైన విధమేదో వొట్టుగ కాఁపురము నీ వుండఁగఁ జోటేదో	॥బహు॥
చిన్నిచిన్ని దేవతల చేఁతల ముద్దులు నిండె కన్నుల నీకివి చూచి కడు సంతసాలు నిండె మన్ననలు వీరికిచ్చి మలసేటి విధ మేదో వున్నతి నీ చింతదీరి వుండుటిఁక నెన్నఁడో	॥బహు॥
నీ దేవియైన లక్ష్మి నిచ్చ సంపదలు నిండె ఆదియై శ్రీవేంకటేశ ఆకె నీ వురాన నిండె పోదియై నీవివియెల్లా భోగించేదేపొద్దో నీదాసులము నేము నినుఁ జింతించితిమి	॥బహు॥