ఆంధ్రభారతి - తాళ్లపాక అన్నమాచార్య కీర్తనలు - దేవశిఖామణివి దిష్టదైవమవు నీవు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 273-1
సంపుటము: 3-418

తాళ్లపాక అన్నమాచార్య

రాగము: బౌళి

దేవశిఖామణివి దిష్టదైవమవు నీవు యీవల నీ బంట నాకు నెదురింక నేది	॥పల్లవి॥
కామధేనువుఁ బిదుకఁగల కోరికెలివెల్ల కామధేనువులు పెక్కుగాచే కృష్ణుఁడవట కామించి నీ బంటనట కమ్మి నిన్నుఁ దలఁచితి- నేమి మాకుఁ గడమయ్య యిందిరారమణా	॥దేవ॥
యెంచఁ గల్పవృక్షమును యిచ్చు సిరులెల్లాను నించి కల్పవృక్షముల నీడల కృష్ణుఁడవట అంచెల నీ బంటనట ఆత్మలో నిన్ను నమ్మితి వంచించఁ గడమ యేది వసుధాధీశ	॥దేవ॥
తగ నొక్క చింతామణి తలఁచినట్లఁ జేసు మిగులఁ గౌస్తుభమణి మించిన కృష్ణుఁడవట పగటు శ్రీవేంకటేశ భక్తుఁడ నీకట నేను జగములో గొఱతేది జగదేకవిభుఁడా	॥దేవ॥