ఆంధ్రభారతి - తాళ్లపాక అన్నమాచార్య కీర్తనలు - దేవ నీ పక్షపాతమో తిరిగే లోకుల వెల్తో - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 273-5
సంపుటము: 3-422

తాళ్లపాక అన్నమాచార్య

రాగము: నారాయణి

దేవ నీ పక్షపాతమో తిరిగే లోకుల వెల్తో శ్రీవిభుఁడ నీవే కాదా చిత్తములోనయ్యా	॥పల్లవి॥
దివములు సరియే దినరాత్రులును సరే యివల సుఖదుఃఖాలు హెచ్చుకుందులేలయ్యా భవములు సరియే ప్రాణములు సరియే భువిఁ బుణ్యపాపముల భోగము వేరేలయ్యా	॥దేవ॥
వినికిందరి కొకటే విషయాలు నొకరీతే మునిఁగేటి జాతిభేదము లివేలయ్యా అనయముఁ జూపొక్కటే ఆఁకలియు నొకటే పెనఁగేటి గుణముల పెక్కుజాడ లేలయ్యా	॥దేవ॥
అంతరాత్మ నీ వొక్కడ వన్నిటా శ్రీవేంకటేశ చింతలు వేవేలైన సిలుగేలయ్యా యింత సేసీ నీ మాయ లిందుకే నీ శరణంటే కాంతుఁడ న న్నిందుకే కాచితివి నేఁడయ్యా	॥దేవ॥