Display:
శృంగార సంకీర్తన
రేకు: 1986-2
సంపుటము: 29-452
తాళ్లపాక అన్నమాచార్య
రాగము: కాంబోది
ఎట్టు మన్నించేవోకాని యిట తరవాతను
చుట్టరికము లెల్లాను చూపి చెప్పఁగా
॥పల్లవి॥
కప్పురము గానుకిచ్చి కడు వినయముతోడ
చెప్పెఁగా నీకుఁ బ్రియము చెలియా
అప్పటిని పొందులకు నాసపడి నీ మాఁటలు
వొప్పుగొని కడునమ్మివుండెఁగాఁ తాను
॥ఎట్టు॥
కదిసి వద్దఁ గూచుండి కంకణాలు గల్లనఁగా
మొదలనే చేతులెత్తి మొక్కెఁగా నీకు
సదరాన నీతోను సరసము లాడి యాడి
మదనకేలికిఁ జొక్కి మరిగెఁగా నిన్నును
॥ఎట్టు॥
చెక్కులఁ జెమటగార సేవలెల్లాఁ జేసి సేసి
మిక్కిలి కాఁగిట నించి మెచ్చెఁగా నేఁడు
యిక్కడ శ్రీవేంకటేశ యేలితి విప్పు డీకెను
వెక్కసపు సంతోసాన వెలసెఁగా యిపుడు
॥ఎట్టు॥
AndhraBharati AMdhra bhArati - telugu కీర్తన సాహిత్యము