ఆంధ్రభారతి - తాళ్లపాక అన్నమాచార్య కీర్తనలు - ఇన్నిటా వేడుకకాఁడు యేమి సేసినాఁ జెల్లును - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

శృంగార సంకీర్తన
రేకు: 1988-5
సంపుటము: 29-467

తాళ్లపాక అన్నమాచార్య

రాగము: ముఖారి

ఇన్నిటా వేడుకకాఁడు యేమి సేసినాఁ జెల్లును యెన్నికాయ దన సుద్దులేల సిగ్గువడీనే	॥పల్లవి॥
కూరిమితోఁ జూతుఁగాని కోపగించఁజాలనే గారవింతుఁగాని యలుగఁగఁగాని సారెఁ బొందుసేతుఁగాని జంకించఁజాలనే యీరీతి నా గుణ మిదియేల సిగ్గువడీనే	॥ఇన్ని॥
మంచిమాఁ టాడుదుఁగాని మరి వెంగే లాడెనే కొంచక నవ్వుదుఁగాని గుంపించఁజాలనే వంచించి మొక్కుదుఁగాని వడి నొడ్డారించనే యెంచితే నా కత లివి యేల సిగ్గువడీనే	॥ఇన్ని॥
చుట్టమనై వుందుఁగాని సూడుఁబాడు బట్టనే మెట్టి సేవసేతుఁగాని మేర మీరనే పట్ట పలమేలు మంగపతి శ్రీవేంకటేశుఁడు యిట్టె నన్నేలినాఁడు యేల సిగ్గువడీనే	॥ఇన్ని॥