Display:
అధ్యాత్మ సంకీర్తన
రేకు: 25-1
సంపుటము: 1-149
తాళ్లపాక అన్నమాచార్య
రాగము: దేశాక్షి
ఒప్పులై నొప్పులై వుండుఁ గాన
అప్పటప్పటికిఁ జూడ నదియేకా నిజము
॥ఒప్పులై॥
కన్నుల కిన్నియుఁ జూడ కలలై వలలై
వున్నతాలు నడ్డాలై వుండుఁ గాన
చిన్న[1]చిన్న చిటి[2]పొటి చిమ్ముదొమ్ము దిమ్ములవి
వున్నవన్నియుఁ జూడ నొకటేకా నిజము
॥ఒప్పులై॥
సారెకు నోరికిఁ జూడ చవులై నవ్వులై
వూరటమాటలై వుండుఁ గాన
తారుమారు తాఁకు సోఁకు తప్పుదోఁపు లిన్నియు
వోరపారులేనివెల్ల వొక్కటేకా నిజము
॥ఒప్పులై॥
మేనికి నిన్నియుఁ జూడ మృదువై పొదువై
వూని సంపదలై వుండుఁ గాన
తేనై తీపై తిరువేంకటేశ నిన్ను
కానవచ్చినదే [3]వొక్కటేకా నిజము
॥ఒప్పులై॥

[1] ‘చన్న’ రేకు.

[2] ‘పాటి’ రేకు.

[3] ‘వొక్కటే నిజము’ రేకు.
AndhraBharati AMdhra bhArati - telugu కీర్తన సాహిత్యము