ఆంధ్రభారతి - తాళ్లపాక అన్నమాచార్య కీర్తనలు - అతఁడే పరబ్రహ్మ మతఁడే లోకనాయకుఁ - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 282-1
సంపుటము: 3-470

తాళ్లపాక అన్నమాచార్య

రాగము: లలిత

అతఁడే పరబ్రహ్మ మతఁడే లోకనాయకుఁ- డతనికంటే మరి యధికులు వేరయ్యా	॥పల్లవి॥
కమలవాసిని లక్ష్మి కలదా యెవ్వరి కైనాఁ గమలనాభునికి నొక్కని కే కాక కమలజుఁడైన బ్రహ్మ కలఁడా యెవ్వని నాభి- నమరవంద్యుఁడు మా హరికే కాక	॥అతఁ॥
అందరు నుండెడి భూమి యన్యులకుఁ గలదా అందపు గోవిందునికే ఆలాయఁగాక చెందిన భాగీరథి శ్రీపాదాలఁ గలదా మందరధరుఁడయిన మాధవునికిఁ గాక	॥అతఁ॥
నిచ్చలు నభయమిచ్చేనేరుపు యెందుఁ గలదా అచ్చుగ నారాయణునియందే కాక రచ్చల శరణాగత రక్షణ మెందుఁ గలదా తచ్చిన శ్రీవేంకటాద్రిదైవానకే కాక	॥అతఁ॥