ఆంధ్రభారతి - తాళ్లపాక అన్నమాచార్య కీర్తనలు - తిరుమలయ్య విందు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

సంకీర్తన
తాళ్లపాక వేంకటశేషాచార్యుల
వ్రాతప్రతి పుట: 237 సంకీర్తన: 248
ప్రత్యేక సంపుటము - సంకీర్తన: 136

తాళ్లపాక అన్నమాచార్య

రాగము: భైరవి

తిరుమలయ్య విందు మంచిదే ^[1] వుండంటే వుంటినమ్మ సరవిలేని చెంచువారి సంతయేలె తనకును	॥పల్లవి॥
పరికిదండ పొగడదండ బండిగురిగింజదండ బెరకులేని పికిలిదండ బలిదండలన్నియు మెరసి కానుకియ్యబోతె మేనిదండలడిగెనమ్మ మరల చెంచువారితోడి మాటలేలె తనకును	॥తిరుమలయ్య॥
ముసురుతేనె జుంటితేనె ముదిరినట్టి పెరలతేనె పొసఁగ మించు పూవుతేనె పుట్టతేనె లన్నియు వొసఁగి కానుకియ్యబోతె మోవితేనె లడిగె నమ్మ యెసఁగ చెంచువారి యెంగి లేఁటికమ్మ ^[2]తనకును	॥తిరుమలయ్య॥
వెలగపండు జీడిపండు వెలలేని మోవిపండు పలుకుదొండపండు పాలపండు కానుకిచ్చితే చెలఁగి పక్కపండు మంట శ్రీవెంకటనాయకుఁడు యెలమి కూడెనమ్మ చెంచు లేఁటికమ్మ తనకును	॥తిరుమలయ్య॥

(ఈ సంకీర్తన 5వ సంపుటంలో 26వ సంకీర్తనగా ఉంది.)

^[1] వుండంట్ట
^[2] తనకు