ఆంధ్రభారతి - తాళ్లపాక అన్నమాచార్య కీర్తనలు - నేరుపు నతఁడే నేరమి నతఁడే - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 283-1
సంపుటము: 3-476

తాళ్లపాక అన్నమాచార్య

రాగము: దేసాళం

నేరుపు నతఁడే నేరమి నతఁడే భారమెల్ల నాతఁడే పని లేదు మాకు	॥పల్లవి॥
దేవుఁడట యంతరాత్మ దేహమెంచి చూచితేను పోవుల కర్మాలు సేయఁ బుట్టినదట జీవుఁ డేఁటివాఁ డిందు శ్రీపతియానాజ్ఞఁ గాక భావించఁ బాపపుణ్యాలు పనిలేదు మాకు	॥నేరు॥
హరి లోకాలేలునట అతని మాయకు లోనై నరుల జీవనములు నడచీనట వెరవులు మాకేల విష్ణుఁడే యింతాఁ గాక పరచు విచారాలు పనిలేదు మాకు	॥నేరు॥
వేడుక నాలుకను శ్రీవేంకటేశు నామమట పాడితో నాతనికి నే బంటనట తోడునీడ యాతఁడే తోవ చూప నాతఁడే పాడయిన కోరికలు పనిలేదు మాకు	॥నేరు॥