Display:
సంకీర్తన
తాళ్లపాక వేంకటశేషాచార్యుల
వ్రాతప్రతి పుట: 28 సంకీర్తన: 26
ప్రత్యేక సంపుటము - సంకీర్తన: 166
తాళ్లపాక అన్నమాచార్య
రాగము: శ్రీరాగం
నీవనఁగ నొకచోట నిలిచివుండుటలేదు
నీవనుచుఁ గనుఁగొన్న నిజమెల్ల నీవే
॥పల్లవి॥
తనయాత్మవలెనె భూతములయాతుమలెల్ల-
ననయంబుఁ గనుఁగొన్నయతఁడే నీవు
తనుఁగన్నతల్లిఁగా తగనితరకాంతలను
అనఘుఁడై మదిఁజూచునతఁడే నీవు
॥నీవనఁగ॥
సతతసత్యవ్రతాచారసంపన్నుఁడై
అతిశయంబుగ మెలఁగునతఁడే నీవు
[1]ధృతిదూలి ద్రవ్యంబు తృణముగా భావించు-
హతకాముకుఁడైనయతఁడే నీవు
॥నీవనఁగ॥
మోదమున సుఖదుఃఖములు నొక్కరీతిగా
నాదరింపుచునున్నయతఁడే నీవు
వేదోక్తమతియైన వేంకటాచలనాథ
ఆదియును నంత్యంబు నంతయును నీవే
॥నీవనఁగ॥

(ఈ సంకీర్తన 1వ సంపుటంలో 232వ సంకీర్తనగా ఉంది.)

[1] ‘దృతి’ రేకు
AndhraBharati AMdhra bhArati - telugu కీర్తన సాహిత్యము