ఆంధ్రభారతి - తాళ్లపాక అన్నమాచార్య కీర్తనలు - మునుల తపము నదె మూలభూతి యదె - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 283-2
సంపుటము: 3-477

తాళ్లపాక అన్నమాచార్య

రాగము: శంకరాభరణం

మునుల తపము నదె మూలభూతి యదె వనజాక్షుఁడే గతి వలసినను	॥పల్లవి॥
నరహరి నామము నాలుక నుండఁగ పర మొకరి నడుగఁ బనియేల చిరపుణ్యము నదె జీవరక్ష యదె సరుగఁ గాచు నొకసారె నుడిగినా	॥మును॥
మనసులోననే మాధవుఁ డుండఁగ వెనుకొని యొకచో వెదకఁగనేఁటికి కొనకుఁగొన యదే కోరెడి దదియే తనుఁ దా రక్షించుఁ దలఁచినను	॥మును॥
శ్రీవేంకటపతి చేరువ నుండఁగ భావ కర్మముల భ్రమయఁగనేఁటికి దేవుఁడు నతఁడే తెరువూ నదియే కావలెనంటేఁ గావకపోఁడు	॥మును॥