వీఁడివో యిదె [1]వింతదొంగ వేఁడిపాలు వెన్న [2]వెరఁజినదొంగ	॥పల్లవి॥
వెలయ నీటఁ జొప్పువేసేటి[3] దొంగ తలగాననీక దాఁగుదొంగ తలఁకక నేలదవ్వేటిదొంగ తెలిసి సందెకాడఁ దిరిగేటి[4] దొంగ	॥వీఁడివో॥
అడుగుకింద లోకమడఁచేటి[5] దొంగ అడరి తల్లికినైన నలుగుదొంగ అడవిలో నెలవైయున్న దొంగ తొడరి నీలికాసెతో నుండుదొంగ	॥వీఁడివో॥
మోస మింతులఁ జేయు మునిముచ్చుదొంగ రాసికెక్కిన గుఱ్ఱంపుదొంగ వేసాల కిటు వచ్చి వేంకటగిరిమీఁద మూసినముత్యమై ముదమందుదొంగ	॥వీఁడివో॥

---

(ఈ సంకీర్తన 1వ సంపుటంలో 322వ సంకీర్తనగా ఉంది.)

^[1] వోయల - నిడురేకు 35.
^[2] నెన్నలుఁబాలు
^[3] వేసిన
^[4] తిరుగాడు
^[5] మఱఁచిన