ఆంధ్రభారతి - తాళ్లపాక అన్నమాచార్య కీర్తనలు - అన్నిటి మూలం బతఁడు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 285-4
సంపుటము: 3-491

తాళ్లపాక అన్నమాచార్య

రాగము: రామక్రియ

అన్నిటి మూలం బతఁడు వెన్నుని కంటెను వేల్పులు లేరు	॥పల్లవి॥
పంచభూతముల ప్రపంచ మూలము ముంచిన బ్రహ్మకు మూలము పొంచిన జీవుల పుట్టుగు మూలము యెంచఁగ దైవము యితఁడే కాఁడా	॥అన్ని॥
వెనుకొని పొగడేటి వేదాల మూలము మునుల తపములకు మూలము ఘనయజ్ఞాదుల కర్మపు మూలము యెనలేని దైవ మితఁడే కాఁడా	॥అన్ని॥
అగపడి సురలకు నమృత మూలము ముగురు మూర్తులకు మూలము నగు శ్రీవేంకటనాథుఁడే మూలము యెగువ లోకపతి యితఁడే కాఁడా	॥అన్ని॥