ఆంధ్రభారతి - తాళ్లపాక అన్నమాచార్య కీర్తనలు - చూడరో చూడరో నేఁడు సురలార నరులార - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 289-1
సంపుటము: 3-512

తాళ్లపాక అన్నమాచార్య

రాగము: సాళంగనాట

చూడరో చూడరో నేఁడు సురలార నరులార దాడివోయి దనుజుల దండించి తా వచ్చె	॥పల్లవి॥
వాయు వేగమున వచ్చె వనజాక్షు నరదము వేయిసూర్యుల ప్రతాపవిభవముతో చాయల చక్రవాళాద్రి సముద్రాలు దాఁటి వచ్చె ఆయితమై పైఁడిటెక్కే లవే కానవచ్చె	॥చూడ॥
మునుకొని మనో వేగమున వచ్చె హరితేరు తనరారు కోటిచంద్రప్రభలతో వెనుకొని దిక్కులెల్లా విజయము సేసి వచ్చె కనకాచలముతో గక్కన సరివచ్చె	॥చూడ॥
గరుడవేగాన శ్రీవేంకటేశు రథము వచ్చె మరగిన యల మేలుమంగసిరితో ధరలోన వీధులేఁగి తన నెలవుకు వచ్చె పరగ హరిదాసుల పంతములు వచ్చె	॥చూడ॥