ఆంధ్రభారతి - తాళ్లపాక అన్నమాచార్య కీర్తనలు - దైవమా నీవే యిందు దయ దలఁచుటఁ గాక - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 295-4
సంపుటము: 3-551

తాళ్లపాక అన్నమాచార్య

రాగము: కన్నడగౌళ

దైవమా నీవే యిందు దయ దలఁచుటఁ గాక తోవనున్న జీవులెట్లు తోసేరు నీమాయ	॥పల్లవి॥
పలుచవులందునెల్ల ప్రాణమే మిక్కిలి చవి బలిమి తీపులలోనఁ బ్రాణమే తీపు యిలపైఁ బూజ్యులలోన నింతులే కడుఁబూజ్యులు తలఁచి జీవులు యెట్టు దాఁటేరు నీమాయ	॥దైవ॥
తగు చుట్టరికాలలో ధనమే చుట్టరికము జగతిఁ గట్టని కట్టు సంసారము వగలైన గుణాలలో వైరమే నిజగుణము జిగిఁ బ్రాణులెట్లు గెలిచేరు నీమాయ	॥దైవ॥
తమలో నెవ్వరికైనా తమ జాతి తమ నేర్పు తమకు నెక్కుడై తోఁచు తక్కువనరు నెమకి శ్రీవేంకటేశ నీదాసులకే కాని భ్రమసిన జీవులెల్లాఁ బాయరు నీమాయ	॥దైవ॥