ఆంధ్రభారతి - తాళ్లపాక అన్నమాచార్య కీర్తనలు - ముద్దుగారే యశోద ముంగిటి ముత్యము వీఁడు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 299-6
సంపుటము: 3-577

తాళ్లపాక అన్నమాచార్య

రాగము: సాళంగనాట

ముద్దుగారే యశోద ముంగిటి ముత్యము వీఁడు తిద్దరాని మహిమల దేవకిసుతుఁడు	॥పల్లవి॥
అంతనింత గొల్లెతల‌ అరచేతి మాణికము పంతమాడే కంసుని పాలి వజ్రము కాంతుల మూఁడులోకాల గరుడపచ్చఁబూస చెంతల మాలోనున్న చిన్నికృష్ణుఁడు	॥ముద్దు॥
రతికేలి రుక్మిణికి రంగు మోవి పగడము మితి గోవర్ధనపు గోమేధికము సతమై శంఖచక్రాల సందుల వైడూర్యము గతియై మమ్ముఁ గాచేటి కమలాక్షుఁడు	॥ముద్దు॥
కాళింగుని తలల పైఁ గప్పిన పుష్యరాగము యేలేటి శ్రీవేంకటాద్రి యింద్రనీలము పాలజలనిధిలోనఁ బాయని దివ్యరత్నము బాలుని వలెఁ దిరిగీఁ బద్మనాభుఁడు	॥ముద్దు॥