ఆంధ్రభారతి - తాళ్లపాక అన్నమాచార్య కీర్తనలు - రాతిరెల్ల సతులతో రతుల నలసెనేమో - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 323-1
సంపుటము: 4-130

తాళ్లపాక అన్నమాచార్య

రాగము: భూపాళం

రాతిరెల్ల సతులతో రతుల నలసెనేమో రీతిగాదు హరి నెచ్చరికె సేయరే	॥పల్లవి॥
పైపై బొద్దువొడచి పంకజములు విరిసె గోప గోవిందుని మేలుకొన మనరే దీపములు దెల్లఁబారె తిమిరమింతయు జారె శ్రీపురుషోత్తమునిఁ జేయంటి లెమ్మనరే	॥రాతి॥
కలువలు ముకుళించీ కలవింక లెలుగించీ నెలఁతలు దేవదేవు నిద్ర దెల్పరే జలనిధి పొంగణగె చాయలచుక్కలు మాసె వలరాచగురు నుప్పవడము గమ్మనరే	॥రాతి॥
జీవులు మేలుకొనిరి చెంగలించె దరువులు భావించి యచ్యుతునిట్టె పలికించరే కావిరింతయు విరిసె కడు సంధ్యకు బొద్దాయ శ్రీవేంకటేశుని విచ్చేయ మనరే	॥రాతి॥