ఆంధ్రభారతి - తాళ్లపాక అన్నమాచార్య కీర్తనలు - విష్ణుదేవు పాదములే విద్యాబుద్ధీ మాకు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 326-2
సంపుటము: 4-149

తాళ్లపాక అన్నమాచార్య

రాగము: లలిత

విష్ణుదేవు పాదములే విద్యాబుద్ధీ మాకు వైష్ణవులమైతి మింక వదలవో కర్మమా	॥పల్లవి॥
గోవిందుని పాదములే కోరి యిహపరములు శ్రీవిభుని పాదములే చేరు వేదశాస్త్రములు దేవదేవు పాదములే దిక్కును దెసయు మాకు భావములో నిలిపితిఁ బాయరో పాపములు	॥విష్ణు॥
హరి పాదములే మాకు నన్నపాన భోగములు పరమాత్ము పాదములే పాఁడీ బంటా మాకు మురహరు పాదములే ముందరవెనకా మాకు శరణంటి మెందైనాఁ జనరో దుఃఖములు	॥విష్ణు॥
అనంతుని పాదములే ఆయుష్య భౌష్యములు దనుజారి పాదములే ధనధాన్య ధర్మములు యెనలేని శ్రీవేంకటేశుడితని పాదాలే మనసున గొలిచితి మానరో భవములు	॥విష్ణు॥