ఆంధ్రభారతి - తాళ్లపాక అన్నమాచార్య కీర్తనలు - చూడవమ్మ కృష్ణుఁడు నీ సుతుఁ డోయమ్మ - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 328-2
సంపుటము: 4-161

తాళ్లపాక అన్నమాచార్య

రాగము: లలిత

చూడవమ్మ కృష్ణుఁడు నీ సుతుఁ డోయమ్మ ఆడీ వీధుల వెంట యశోదమ్మా	॥పల్లవి॥
కోలలు చాఁచీ వుట్లు గొట్టఁగా బాలుఁ బెరుగు కాలువలు గట్టి పారెఁ గదవమ్మా మేలములాడీ వద్దంటే మిక్కిలి గొల్లెతలతో ఆలకించి వినవమ్మ యశోదమ్మా	॥చూడవమ్మ॥
చక్కిలాల కుండలెల్లా చలాన దొండ్లు వొడిచి దిక్కన దోఁటికోలలఁ దీసీనమ్మా చిక్కని తేనె చాడె చివ్వన రాత వేసితే అక్కడ జోరునఁ గారె యశోదమ్మా	॥చూడవమ్మ॥
అల్లంత నుండి తన కందరాని తెంకాయలు వల్లె తాళ్ళు వేసి వంచీనమ్మా బల్లిదుఁడలమేల్మంగపతి శ్రీవేంకటేశుఁడు అల్లిబిల్లై యున్నాఁడమ్మ యశోదమ్మా	॥చూడవమ్మ॥