ఆంధ్రభారతి - తాళ్లపాక అన్నమాచార్య కీర్తనలు - జగతిలో మనకెల్ల జయంతి నేఁడు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 331-2
సంపుటము: 4-179

తాళ్లపాక అన్నమాచార్య

రాగము: భల్లాటి

జగతిలో మనకెల్ల జయంతి నేఁడు పగటున నందరికి పండుగ నేఁడు	॥పల్లవి॥
అదివో శ్రావణ బహుళాష్టమి నేఁడు పొదిగొన్న రోహిణి సంపూర్ణము నేఁడు కదిసి యద్దమరేత్రికాడ నేఁడు ఉదయించెఁ గృష్ణుఁడు చంద్రోదయాన నేఁడు	॥జగ॥
వసుదేవదేవకుల వరము నేఁడు పసగా ఫలియించె రేపల్లెలో నేఁడు కొసరి యశోదనందగోపుఁడు నేఁడు - యీ సిసువును సుతుఁడంటాఁ జెలఁగిరి నేఁడు	॥జగ॥
హరిమాయ కంసుమద మడఁచె నేఁడు పొరుగిరుగులవా రుప్పొంగిరి నేఁడు సిరి నలమేల్మంగతో శ్రీవేంకటేశుఁడై నిల్చె అరుదుగా గొల్లెతలు ఆడుకొనేరు నేఁడు	॥జగ॥