ఆంధ్రభారతి - తాళ్లపాక అన్నమాచార్య కీర్తనలు - ఎంత విభవము గలిగె నంతయును నావదని - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 29-6
సంపుటము: 1-181

తాళ్లపాక అన్నమాచార్య

రాగము: ధన్నాసి

ఎంత విభవము గలిగె నంతయును నావదని చింతించినది గదా చెడని జీవనము	॥ఎంత॥
చలముఁ గోపంబుఁ దనుఁ జంపేటి పగతులని తెలిసినది యదిగదా తెలివి తలకొన్న పరనింద తనపాలి మృత్యువని తొలఁగినది యదిగదా తుదగన్న ఫలము	॥ఎంత॥
మెఱయు విషయములే తనమెడనున్న వురులుగా యెఱిఁగినది యదిగదా యెరుక పఱివోని యాస దనుఁ బట్టుకొను భూతమని వెఱచినది యదిగదా విజ్ఞానమహిమ	॥ఎంత॥
యెనలేని తిరువేంకటేశుఁడే దైవమని వినఁగలిగినదిగదా వినికి అనయంబు నతని సేవానందపరులయి మనఁగలిగినదిగదా మనుజులకు మనికి	॥ఎంత॥