వట్టియాసలకు లోనై వదలక తిరిగాడేవు బట్టబయలు యీసంసారంబని గుట్టు దెలియలేవు ప్రాణీ	॥వట్టి॥
చాల నమ్మి యీ సంసారమునకు సోలి సోలి తిరిగేవు బాలయవ్వనప్రౌఢల భ్రమఁబడి లోలుఁడవై తిరిగేవు మేలుదెలియ కతికాముకుండవై మీఁదెఱఁగక తిరిగేవు [1]మాలెమీఁద పరు వెందాఁకా నీ మచ్చిక విడువఁగ లేవు	॥వట్టి॥
మానితముగ దురన్నపానముల మత్తుఁడవై వుండేవు నానావిధముల [2]దుష్కర్మంబులు నానాటికి నాటించేవు మేనిలోని యేగురు నార్గురును మిత్రులనుచు నమ్మేవు ఆనందంబున నాకర్మమునకు అధిపతులని తెలియఁగ లేవు	॥వట్టి॥
[3]పామరివై దుర్వ్యాపారమునకు పలుమారునుఁ బొయ్యేవు వేమరు దుర్జనసంగాతంబులు విశ్రామమనుచు నుండేవు ప్రేమముతో హరిదాసులపై సంప్రీతి నిలుపఁగా లేవు తామసమతివయి వేంకటనాథుని తత్వ మెఱఁగఁగా లేవు	॥వట్టి॥

---

^[1] ‘మాళిగ’కు వ్యావహారికరూపమా? తేనె దీయునప్పుడు కొండచరుల నడుమ గట్టెడి చిన్నమంచెవంటిదియా?

^[2] ‘దుఃక్కర్మ’ రేకు.

^[3] ‘పామర’ శబ్దమునకు వ్యావహారికశబ్దము కావచ్చు.