ఆంధ్రభారతి - తాళ్లపాక అన్నమాచార్య కీర్తనలు - వేగిరించనేల విష్ణుఁడే యింతకుఁ గర్త - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 339-1
సంపుటము: 4-226

తాళ్లపాక అన్నమాచార్య

రాగము: మాళవశ్రీ

వేగిరించనేల విష్ణుఁడే యింతకుఁ గర్త బాగుగా నాతని యిచ్చఁ బరగుటే కాక	॥పల్లవి॥
తలపోఁతలేల దైవము గలుగఁగాను చెలఁగి యాతఁడే యిన్నీఁ జేసీఁగాక యిల నేఁడె పుట్టెనా యింకాఁ గలది గాదా పలులోకాలు నడప భారము దేవునిదే	॥వేగి॥
చింత లిఁకనేలా శ్రీపతి గలుగఁగాను మంతుకుఁ బుట్టించి తానే మనుపుఁగాక వింతా యీ దేహము వేరా యీ యింద్రియాలు యింతట బ్రహ్మాండనాథుఁ డిందరికి నొకఁడే	॥వేగి॥
సిలుఁగు గోరికలేల శ్రీవేంకటేశ్వరుఁడు కలఁ డాతఁడే మనలఁ గాచీఁగాక వెలసి యాతనిమాయే విశ్వమింతా నిండినది తెలిపి రక్షించుటకు దిక్కు దెస యితఁడే	॥వేగి॥