ఆంధ్రభారతి - తాళ్లపాక అన్నమాచార్య కీర్తనలు - అనుచుఁ బొగడఁ జొచ్చేరదె బ్రహ్మాదులు మింట - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 340-3
సంపుటము: 4-234

తాళ్లపాక అన్నమాచార్య

రాగము: పాడి

అనుచుఁ బొగడఁ జొచ్చేరదె బ్రహ్మాదులు మింట మొనసి యీ బాలునికే మొక్కేము నేము	॥పల్లవి॥
వున్నతపు లోకములు వుదరాన నున్నవాఁడు అన్నువ నీ దేవకిగర్భమందు వుట్టెను మన్నించి యోగీంద్రులమదిలోనుండెడువాఁడు పన్నిన పొత్తులలోన బాలుఁడై వున్నాఁడు	॥అను॥
పాలజలధిలోన పాయనిగోవిందుఁడు పాలు వెన్న లారగించె పైఁడికోరను వోలిఁ దన విష్ణుమాయ నోలలాడినట్టివాఁడు చాలి మంత్రసానులచే జలకమాడీని	॥అను॥
ముగురువేల్పులకు మూలమైన యట్టివాఁడు తగుబలభద్రునికి తమ్ముఁడాయను నిగిడి వైకుంఠమున నిలిచి రేపల్లెనుండి యెగువ శ్రీవేంకటాద్రి నిరవాయ వీఁడే	॥అను॥