ఈ భవమునకుఁ జూడ నేది గడపల తనదు- ప్రాభవం బెడలించి బాధఁ బెట్టించె	॥ఈ భవ॥
చెప్పించెఁ బ్రియము వలసినవారలకునెల్ల రప్పించె నెన్నఁడును రానిచోట్లకును వొప్పించె నాసలకు వోరంత [1]ప్రొద్దునను తిప్పించె కోరికల తిరిగి నలుగడల	॥ఈ భవ॥
పుట్టించె హేయంపు భోగయోనులనెల్ల కట్టించె సంసారకలితబంధముల పెట్టించె ఆసలను పెడ[2]కొడములఁ దన్ను తిట్టించె నిజద్రవ్యదీపకుల చేత	॥ఈ భవ॥
బెదరించె దేహంబు పెనువేదనలచేత చెదరించె శాంతంబు చెలఁగి చలమునను విదళించె భవనములను వేంకటేశ్వరుఁ గొలిచి పదిలించె నతని కృప పరమసౌఖ్యములు	॥ఈ భవ॥

---

^[1] ‘రొద్దు’ రేకు.

^[2] ‘కొడము’ ప్రవాహమున చేపలను పట్టుటకు ఒడ్డెడి సాధనము కావచ్చు.