ఆంధ్రభారతి - తాళ్లపాక అన్నమాచార్య కీర్తనలు - ఇందరి గాచిన నీవు యిట్టే నీవు నాకు - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 359-6
సంపుటము: 4-350

తాళ్లపాక అన్నమాచార్య

రాగము: సామంతం

ఇందరి గాచిన నీవు యిట్టే నీవు నాకు కందువ నిధానమవై కలవుగా నీవు	॥పల్లవి॥
అరసి ధ్రువుని గాచినట్టి నీవు కరుణతోఁ బ్రహ్లాదుఁ గాచిన నీవు కరిరాజు శరణంటేఁ గాచిన నీవు కరతలామలకమై కలవుగా నీవు	॥ఇందరి॥
గట్టిగా విభీషణుఁగాచిన నీవు అట్టె ద్రౌపదిఁ గాచినప్పటి నీవు చెట్టవట్టి బలిఁగాచిన నీవు నాకు కట్టిన ముడుపవై కలవుగా నీవు	॥ఇందరి॥
కమ్మర సుగ్రీవునిఁ గాచిన నీవు నేఁడు కిమ్ముల లోకములు రక్షించే నీవు నెమ్మది శ్రీ వేంకట నిలయ నీవు మాకు కమ్ముకొని దాపుదండై కలవుగా నీవు	॥ఇందరి॥