ఆంధ్రభారతి - తాళ్లపాక అన్నమాచార్య కీర్తనలు - అతఁడే యెక్కుడు దైవ మందరికంటే - తాళ్ళపాక అన్నమాచార్య - అన్నమయ్య పెదతిరుమలాచార్య చిన్నతిరుమలాచార్య చినతిరుమలాచార్య అన్నమయ్య కీర్తనలు సంకీర్తనలు

అధ్యాత్మ సంకీర్తన
రేకు: 366-1
సంపుటము: 4-387

తాళ్లపాక అన్నమాచార్య

రాగము: ముఖారి

అతఁడే యెక్కుడు దైవ మందరికంటే తతినింకాఁ జెప్పిచూప దైవాలు గలవా	॥పల్లవి॥
జలధి దచ్చేనాఁడు సకల దేవత లుండ యెలమి నేదేవుఁ జేరె నిందిరాదేవి అల గజేంద్రుఁడు మూలమని మొరవెట్టునాఁడు వెలయ నే దేవుఁడు విచ్చేసి కాచెను	॥అతఁ॥
పుడమి గొలుచునాఁడు పొడవైన దేవతలు కెడసి యెవ్వ రడుగు కింద దాఁగిరి కడలేని జగములు గల్పించే బ్రహ్మదేవుఁ - డడరి యే దేవు నాభియందుఁ బుట్టెను	॥అతఁ॥
యెంచి నాఁడు దేవతల నింద్రియాల జొక్కించే - పంచబాణుఁ డేదేవునిపట్టి, యిపుడు కొంచక శ్రీ వేంకటాద్రిఁ గోరిన వరము లిచ్చి అంచల లోకములేలీ నండ నే దేవుఁడు	॥అతఁ॥